Tyol Nejenel
Tziyin qu’na aju aq’untl tu’n t-xi’ b’inchet ti’j tb’anil niky’ib’eb’il tu’n nejenel te twitz Paxil, nqo’ onina kyi’j ja aq’untl twitz tnam aqe’ nchi b’inchan onb’il ti’j niky’ib’eb’il, aqe’ aq’untl te ka’yil tichaq niky’ib’eb’il ate’ tuj jun matij ja, jatumel in chi ten qe’ tichaq lu’, tu’ntzan tpaj qa ate’ jaxjal mixti’ jun tumel te kyniky’ib’eb’il iltza’n ti’j tu’n t-xi’ kyiqin jun tb’anil onb’il lu’.
Aju Ttxu Aq’untl te INDECA in onin ex nb’inchan ti’j qe’ aq’untl tun tten jun lamob’il twitz Pawil, k’amol toj jun chmob’il matij ja, b’inchal tten, k’ub’ilte ex tu’n kyxi’ q’et qe’ niky’ib’eb’il tu’n kyajb’en te junjun ttxu ja te aq’unb’il aqe’ nchi onin tu’n t-xi’ ka’yit alkye qe’ xjal tu’n t-xi’ niky’ib’eb’il kye.
Ikytza’n toj q’ij ja’la ma txi’ b’inchet tojxix tb’anil ajo onb’il kye txqantl ja aq’unb’il te Twitz Paxil ajo qe’ kyajb’il onb’il, ajo lu’ in b’ichet kyu’nqe’ xjal at kyk’ojlalil tu’n kukx kyxi’ b’inchet, nxi’ q’et jun xnaq’tzb’il ex yek’b’il te ojtzqib’il tza’n tu’n t-xi’ kyb’inchan aq’untl te niky’ib’eb’il, ax ikytza’n o txi’ b’inchet tumel tu’n kyten matij ja chmob’il niky’ib’eb’il tojxix tb’anil.
Toj tq’ijlal ja’la ate’ wuq jab’inchb’il wab’j nchi aq’unan kyi’j wab’j mo niky’ib’eb’il ntzaj tonin PMA, atzan ite’ toj tnam lu’: Fraijanes, Chimaltenango, Retalhuleu, Txeljub’, Tactic, Los Amates ex Ipala, jatumel nchi chmet qe’ niky’ib’eb’il ikytza’n chenaq, arroz ex ixi’n ex ikytza’n qe’ txqantl b’inchan maj ex b’a’n kyk’uk’set, lem b’incha’n tu’n k’ul, tb’anil harinas, tb’anil k’wab’j ex quq leche.
Ikytza’n qe’ ma chi chiky’ib’et tjaq’xa ajo ttxu aq’unb’il in onin ti’j chiky’ib’ab’il ttxolil kolb’il kye xjal tu’n niky’ib’eb’il te Twitz Paxil, kyxol lu’ ja’ku b’antl tq’umanjtz kyb’i: aqe’ k’wal namaqx kyel jwe’ ab’q’i at nim yab’il tu’n tpaj wayej kyi’j, tu’n t-xi’ ka’yit qe’ xu’j/qya ex qe’ nchi on kych’u’ kyne’, q’ol niky’ib’eb’il toj jaxnaq’tzb’il te tnejil kol, ax ikyxtza’n kye jaxjal ntzaj jun mya’ b’a’n kyi’j tu’n qe’ tpaj jb’al ex txqantl ntzaj twitz tx’otx’ ex tu’n onb’il kye txqantl quky’il ataq tajb’en kye.
Ajo tajb’en paqanil lu’ atzan tu’n t-xi’ ka’yit ex chiky’ib’et jun tqanil tib’aj qe’ aq’untl nchi b’inchet, tza’n tok ttxolil aq’untl ex tza’n taq’unanjtz pwaq kyu’n qe’ ja aq’unb’il ex ikytza’n nxi’ qanin tu’n ttxu aq’untl te twitz tnam Paxil, ajo t-xilen tu’n tb’injtz tqanil kyu’n xjal ex tajlal pwaj ntzaj q’o’n tu’n tch’iy ajo tb’anil aq’unab’il te junjun ja ttxu aq’untl.